SHFK “Jeronim De Rada” kampione futbolli në garat tradicionale “Isa Ameti”

Shkolla fillore komunale “Jeronim De Rada” nga Çerkezi i Kumanovës është shpallur kampione në garat tradicionale në futboll “Isa Ameti”,  të organizuara nga SH.A.SH. Kumanovë -Likovë për nder të 7 Marsit-Ditës se Mësuesit. 
Ata në finalen e madhe, të zhvilluar të enjten, kanë mundur Sh.F. “Faik Konica” nga Sllupçani me rezultat 4-3, pas ekzekutimit më të mirë të penalltive, ngase në kohën e rregullt ndeshja përfundoi me rezultat të barabartë 2-2. Vendin e tretë e ka fituar shkolla fillore “Kultura” nga fshati Mateç.
Finalja është luajtur në sallën sportive në Sllupçan, ndërsa në këto gara morën pjesë 11 shkolla fillore shqipe nga komuna e Kumanovës dhe Likovës. 
“Jemi tepër të kënaqur që fituam vendin e parë. Mendoj se e kemi merituar, pasi nxënësit janë futbollistë shumë të mirë, poashtu edhe arsimtarët që janë në rolin e trajnerëve kanë udhëhequr si duhet ekipin e shkollës tonë. Për këto gara kemi bërë stërvitje të regullta dhe kujtoj se suksesi ka ardhur si rezultat i punës sonë. Uroj që të vazhdojmë me suksese të tilla edhe në garat e ardhshme sic janë ato komunale, zonale, ndërzonale dhe republikane”, ka deklaruar për gazetën “Lajm”, Hakik Jahiu, drejtor i Shkollës fillore komunale “Jeronim De Rada” nga Çerkezi. 
Kujtojmë se, kjo shkollë vitin e kaluar e kishte fituar vendin e parë në garat republikane të shkollave fillore në tërë Maqedoninë.